رغم الجفى و الوفاء مازلت نحبْ

رغم الجفى و الوفاء مازلت نحبْ
بعد ما شاح غصن العمر في إيديا

جف حبر الوفاء و الكذب غلبْ
مازلت نغوص في ضماير الحية

سكّرت باب الرجى و عتاب صخبْ
لا عاد ينفع الــلوم في كل ثنيْة

طريڨ العمر طول و العمر هربْ
ليام تجري عليك و تجرى عليا

تعرف دوم مظاهر الناس تكذبْ
الوجوه تكشف فى عواطف خبية

الناس معادن كاملة و النقص ركبْ
نحاس و ذهب و العاج ڨسية

لي تصاحبو بصدق الڨلب يهربْ
في الظاهر وفي في الخافي حية

تڨرب ليه يسلعك و تدير جنبْ
تهرب عليه يقدح و يزيد السية

شاح هواه في ثناه تقول نحبْ
نفض وصالو كيف الورڨة النْية

عاقمة في فصل الخريف جدبْ
لا سالت عليه الدموع سخية

لصحاب من الحسد و البغض تڨلبْ
باتت على جمر الغضى تراقب فيا

نفيس المعانى خرج قوافي هبْ
كيف نسيم المسك تبخ ْشوية

صبحت القلوب ڨاسية حجر صنبْ
كبـار صغار منهم مرا و صبية

تبقى تسعى كل الحياة تكسبْ
شفتيش مال ينفع وقت منية ؟؟

غالي النفس الروح لا مال ذهبْ
ينقص و يزيد بش تعوض الدية

شهيت نرجع لأيام صغري نشبْ
الفكر خالى زاهي صباح و عشية

نسهر على وميض نجوم شهب
صغير حالم ، الحلم يراجي فيا

بين الليل و نهار الحياة تدبْ
تبدى حياة جديدة معاها قوية

اليوم كبرت من غير الكبر تعبْ
حامل همومى جبال ثڨيلة عليا

نعرف الصبر علقم فى كاس شربْ
فرج الضيڨ يجيك كيف " الهدية "

النفس شهوة و نزوة ملاها شغبْ
الطمع حبالو ڨصيرة رهيفة طريّة

همت في دروب الحياة نجربْ
خالطت اليهود بلا حدود ثنية

ريت الناس كلها صناديق و كـتب
هزيت من عقول الكنوز وصيّة

تعرفت بلا مصلحة دواوين كتبْ
وين ما نحب فى عالم عندي بقية

عند العجم و الفرس شرق الغربْ
شاع إسمى هلال فى الفجرية

لڨيت الباهي عاش مات ما كسبْ
لعراق كثرت و القــلوب صفية

لا خير شفتو في رضوخ عربْ
من غير عار كشف النسب هوية

مازال ڨلبي أصفى من الحبْ
كيف الشهد الصافي ساح شوية

جرح الخواطر ما فيه الطبْ
يبقى نازف طول العمر بقية

يا حليل "الطيب " لوين يهرب ؟؟
مابقاتش "صحبة" و ألفة سوية

ما بقاتش محبة و الحال طربْ
كان شقاء و شغب و افعال رزية

يا طير طاير لمرسول الحبْ
بــلٌغ سلامي لاحبب جيب برية

فاض حبهم مهجة الشوڨ تغلبْ
معاهم القلب في الروح ضحية

نضاف السراير ما تلڨى الشبْ
خيار لعمال عندهم مبداها النية

رغم الجفا و الوفاء مازلت عريف
عليم خبايا جميع نفوس وضيعة

معروف فى كل عالم بلا تعريف
عندي كل أجناس حذايا سمعية

نفضت همومي كي ورڨ خريفْ
طريق العمر رحلة آوقاتو سريعة

بعد فصل ربيع يجيك الصيفْ
تحن لوقت شتاك تزرع زريعة

تهدى خواطرك ، من هزف زفيفْ
بين سكينة النفس ڨدام طبيعة

تشتاڨ وقت ماضي خيال طيفٔ
ترجاه يجيك لحضة يخفف لوجيعة

تعيش, ذكرى جميلة علــــكيفْ
يجيك أرواح لحباب جـــميعة

تڨول يا ريتني نــــرجع وليف
صغير معاهم فى دروب وسيعة

نجري فارح في طرڨ الريف
مع زينة البنات نشتي سويعة

لكن همومنا كبرت بالسّيف
في كل يوم تسمع وقيعة

من كان عزيز النفس شريف
صبّح في عيشتو قابل لخديعة

مع عباد الخلڨ تحب التزييف
" الصدق" سلعة رٍخستلو البيعًة

الخايب في شرطو زيدلو تغليف
دز احشيلو في عرف شريعة

تجيك أعيان حشود و تشريف
كيف يسمع بيها تهزو الفجيعة

لصحاب صبحت نعت الضيف
تهرب وقت الشدة تحب القطيعة

ملاهيط كثرت و ناصبة مناديف
بالك في طريڨهم تخلٍى الوديعة

صبحت نحٍب ناس التحريف
نخالط اولاد "الكرد "و الشيعة

لا نعاشر الكرب تحٍب التكوليف
الدين داروه " تجارة " و شريعة

الحرام في مالهم أولادهم كيف
نبٌت في ساس الدار خلف زرٌيعة

يا حيف على عربنا يا حيفْ
خلٍو بناتهم في المال سليعة

مازال يم بحري غارڨ و طفيفْ
من كون ربي و خالقي نطيعة

صعيب عليك يكيدك تجديفْ
لا تحّدو ضفاف في البر طليعة

ياما غرقت ، سفن و مجاديفْ
فيه أمواجو هايجة و منيعة

من دخلو مات تلڨاش سعيفْ
مشتاق لذة لحياة في ضيعة

من حال أولاف يشٌف السخيفْ
صبحت أعراف و عادات شنيعة

المعيشة غلٍت و فاقت تكاليف
صبح العبد ارخس من الكيف

قصٌو الماء و الضو في الصيف
صبحت حياة شريڨى بو رجيعة

الشعوب عايشة كيف صراعيف
مشتاڨة رغيف خبز و شميعة

نشرو في الماء و نڨولو نظيف
نشربوه شلوڨ فى كاس قريعة

غيرها عباد ناس تعيف التسريف
تڨول يا ريتني نعمل القطيعة