የስያሜ ሚዛን

ሀገሬ ቅኔዬ ሰምና ወርቅሽን በተግባርሽ አውሪ
እስቲ ላንዴ አድምጭኝ ለልጅሽ ተጠሪ
ተቀመጪ ስሚኝ ከፍርድ ሸንጎዬ
ተከሳሽም ዳኛም አንቺ ነሽ እምዬ
ስያሜ ነው ክሴ ካንቺ ጋር በኖርኩት በትንሹ እድሜዬ

ከተግባር ሚዋደድ ባልሆን ስም ቀማሪ
ቅር ይልሽ ይሆን ወይ
በዚህ ብሰይምሽ እንዲህ ብትጠሪ
ከበዙ ስሞችሽ የሚገልጽ ስምሽን
ልቆ የሚመዝን ከስያሜ ሚዛን
ከስሞችሽ መሐል ስምሽ የቱ ይሆን?

አንቺ የገዢዎች ግዙ
የጌታ መጋዣ የጪሰኛ ወዙ
በዘመን እርጅና እድሜ ጠገብ ኗሪ
ከባላባት ቤት ስር የባርያ ቀባሪ
የዘመን አንቡላ የታሪክ ቅራሪ
የደም አኬልዳማ ነፍስ በልቶ አዳሪ
የምስኪናን እምባ ንፁህ ምታጎድፊ
የገዳዮች ምድር ስለታም ቀጣፊ

የማልገራሽ ፈረስ የማትቆሚ ጅረት
ጊዜ ማያርምሽ የማትጠግቢ ሞት
በአልቃሾችሽ እምባ ደጅሽን ምታጥቢ
ልጆችህን ማግረሽ ቤት ምትገነቢ
ጠላት ልታኖሪ ጠላት ልታስገቢ

ሀገሬ ቅኔዬ ሰምና ወርቅሽን በተግባርሽ አውሪ
እስቲ ላንዴ አድምጭኝ ለልጅሽ ተጠሪ
ተቀመጪ ስሚኝ ከፍርድ ሸንጎዬ
ተከሳሽም ዳኛም አንቺ ነሽ እምዬ
ስያሜ ነው ክሴ ካንቺ ጋር በኖርኩት በትንሹ እድሜዬ

ከተግባር ሚዋደድ ባልሆን ስም ቀማሪ
ቅር ይልሽ ይሆን ወይ
በዚህ ብሰይምሽ እንዲህ ብትጠሪ
ከበዙ ስሞችሽ የሚገልጽ ስምሽን
ልቆ የሚመዝን ከስያሜ ሚዛን
ከስሞችሽ መሐል ስምሽ የቱ ይሆን?

አንቺ የሐሰት ሹመኛ መቀመጫ መንበር
የጉልበተኞች የባለጡጫ ፈር
ስለእውነት ኗሪንምታለብሺ አፈር
የፌዘኛ ዜማ የቧልተኛ ምድር

አንቺ ባልሽን ምትገፊ ለውሽማሽ ድሎት
ልጆችን የሰረቅሽ ከልጆችሽ አባት
የሐቀኛ ዕምባ የደም አፍሳሽ መሬት
እውነት ስምሽ ማነው አንቺን ሚጠሩበት

አንቺ የእምነት ጥላሸት የክህደት ማኖርያ
የቀማኛ ደስታ የነጣቂ ወኔ የትዕቢት ማጎርያ
የፃድቅ ገሃነም የሃጥዕ አለሙ የፍርድ ማጣመምያ
ሀገሬ ቅኔዬ ሰምና ወርቅሽን በተግባርሽ አውሪ
እስቲ ላንዴ አድምጭኝ ለልጅሽ ተጠሪ
ተቀመጪ ስሚኝ ከፍርድ ሸንጎዬ
ተከሳሽም ዳኛም አንቺ ነሽ እምዬ
ስያሜ ነው ክሴ ካንቺ ጋር በኖርኩት በትንሹ እድሜዬ

ከተግባር ሚዋደድ ባልሆን ስም ቀማሪ
ቅር ይልሽ ይሆን ወይ
በዚህ ብሰይምሽ እንዲህ ብትጠሪ
ከበዙ ስሞችሽ የሚገልጽ ስምሽን
ልቆ የሚመዝን ከስያሜ ሚዛን
ከስሞችሽ መሐል ስምሽ የቱ ይሆን?