Nisamehe Ya "Lattifu"

Nisamehe Ya "Lattifu"

Nisamehe Ya "Lattifu"
Nisokupa hakki yako
Nisojuwa utukufu
Adhama na nguvu zako
Najiona ni dhaifu
Sijuwi kadiri yako
Uhifadhi moyo wangu
Rabbi usiote kutu
Leo nakutaja Mungu
Kama namtaja mtu
"Khalikku" wa ulimwengu
Uloumba kila kitu
Faradhi nitetemeke
Napokuwaza "Manani”
Niwe mwoga nikuweke
Daima juu kichwani
Nisujudu nisichoke
Nikumbuke wewe nani
"Subhana wa Taala"
Mfalme wa duniya
Ulotanda kila mahala
Mbinguni na ardhiya
Mwenye sifa za kamala
Bora zilotimiliya
"L Wahid" mwenye 'Quwa'
Mwenye zote khatuwa
Mpangaji mpinduwa
"Hakim” unoelewa
Kufumba na kufumbuwa
Utakalo linakuwa
Muweza ulotukuka
Muendesha duniya
Kilozuka kitozuka
Na kila linalotukiya
Ni amri yaitika
“Mwenyewe” meamriya

Mwenye funguo za shani
Za ghebu ya madahari
"Alimu" nje na ndani
Ya bara na mabahari
Lidondoke hata jani
Unalijuwa “Qahhari"
Si chembe ya ardhini
Kinyevu au yabisi
Kwenye totoro kizani
Na piya zake kiyasi
Yabaini kitabuni
Unayajuwa “Mkwasi”
Ya Salaam! Ya "Saburu"
Ya “Karimu” ya “Rahimu”
Mwenye sifa ya "Shakuru"
Kwa wema walo adimu
Na lcwa 'aasi' ni "Ghafuru"
Hoja toba aitimu
Rabbi menipa makkamu
Huru; si ya Malaika
Khiyari menikirimu
Na Kuraani 'tarikka'
Nifuzu duniya tamu
Na Pepo inosifika
Lipi kubwa nifanyalo
Kunipa neema zako
Lipi kubwa nitendalo
Kustahi Pepo yako
Pendo gani nikupalo
La kushinda pendo lako
Wanipenda Mola wangu
Pendo halina mithali
Hulibali kosa langu
Na liwe kama jabali
Hoja kwako toba yangu
Na jaza wanipa mbali

Wanipenda bwana wangu
Nikushukuru niliye
Huhitaji kitu kwangu
Ninohitaji ni miye
Kwa kila pumzi yangu
Ni tunu wanipa weye
Ya "Hadi" nipe hidaya
Nipe Nuru ya imani
Nipe busara dhatiya
Nikujuwe “Rahmani”
Nikutii niwe 'waliya'
Nife mja ihsani
Ameen